كتابة إسلام إبراهيم حسين
اليوم هو يوم #NoSCAF.
المجلس الأعلى للقوات المسلحة. من أين أبدأ، لا أعرف. لكن دعني أتكلم بالمصرية الفصحى فقط لأجل خاطر موضوع المجلس الأعلى للقوات المسلحة ده.
إيه اللي قالقني من المجلس؟ طيب، خلينا نشوف أخر رسالة مثلا (رسالة رقم ٥٦)، بيقولك:
قيام بعض العناصر الخارجية
يعني شوية ناس مش مصريين. فهمت.
من مدعي البطولة و الوطنية.
إيه؟ مش فاهم؟ أجانب بس بيدعوا الوطنية؟ إزاي تيجي ديه؟ أه، يبقو مصريين بيدعوا البطولة بس هما في الحقيقة خارجين و مصريين وحشين. يعني مصريين نص نص. يعني عندنا مجلس عسكري بيتهم مصريين بأنهم خونة!
معليش يا مجلس! أي مواطن مصري، أيا كانت أرائه، مفتعلة أو لأ، لا يمكن اتهامه بأنه مدفوع من الخارج. ديه تهمة رهيبة جدا و مش ممكن أبدا تستخدم ضد حد إلا إذا كان ضد حد معيا، و بتهم معينة، و تطرح بوضوح عن طريق محاكمة علنية. لكن ببساطة كدة، تستخدمو الاتهام ده ضد مواطنين مصريين غير محددين، فده معناه إنو تهديد ضد أي مواطن إنو مايتكلمش، و لو إتكلم بصوره مش هترضي المجلس، يبقى يقول على نفسه يا حفيظ لأن بمنتهى البساطة ممكن يلاقي نفسه في قفص إتهام بتهمة خيانة البلد.
المجلس و أي حكومة مصرية في المستقبل لازم تحترم كل مواطن و كل ما يقول. المواطن فوق المجلس و فوق الحكومة و فوق مصر نفسها! تبقى إيه مصر لو ماكانش البني آدم اللي هو جزء منها مالوش إحساس بالطمأنينة و الحرية في بلده؟
بقيت الرسالة مبنية على الاتهام المبهم ده و مش هناقش بقيتها دلوقتي.
خلينا نشوف رسالة رقم ٥٥. الرسالة ديه ملخصها إنو أنتم يا شعب يا ولاد يا وحشين مش مؤدبين. و عشان كدة عاقبتكم، بس عشان أنا بس طيب و سيد سيدكم، هخفض العقوبات. يلا احمد ربك، و هشو بقى من هنا.
سؤالي و ردي على الرسالة: و ليه تقبضو عليهم من الأول؟ إيه كانت تهمهم بالظبط؟ و ليه لو فيه تهم و فيه كسر للقانون واضح، ليه متكنش المحكمة علنية؟ لأن لو أنتم عندكو حق، هنأيدكم، و لو لأ، هانؤلكم يوم الجمعة. كل يوم جمعه! :) نظامنا واضح جدا. ليه ماتكونوش إنتو كمان واضحين مع الشعب؟ و بعدين الشعب كبير خلاص و مابياخدش منة ولا مصروف من حد.
طيب، نشوف رقم ٥٣. يا مجلس إحنا شاكرين للتوضيح، بس ممكن تتم محاكمة المسئول عن قتل المواطن رامي فخري علانية؟ أصلو إحنا مش زي الناس اللي بالي بالك إلي بتحكم الناس في السر و بعدين تمن عليهم بتخفيض العقوبة. إحنا عايزينها علنية و عادلة. و أقل من كدة و تبقو افقدتم شرعيتكم في نقطة ديه بنفسكم.
شاكرين على الرسالة رقم ٥٢، بس لأ لامؤاخذة مفيش تسامح مع أي حد من الشرطة اللي ساهم في قتل و تعذيب و إهانة المصريين. لازم اللي غلط يتعاقب (في محاكمة علنية) عشان المأساه المعروفة بإسم النظام الفاسد السابق ما تتكررش تاني بإسم النظام الفاسد المستقبلي!
أما بنسبة موضوع الاقتصاد، لحد دلوقتي ماحدش فهمني إزاي شوية مظاهرات بتوقف عجلة الإنتاج؟ والله ماحدش شرح إزاي ده. في رأي إنو الموضوع موضوع تخويف و ترهيب ... و لا علاقة له أبدا بالإنتاج. اللي عايز يشتغل، يشتغل. التظاهر مش بيوقفوهم، و اللي عايز يتظاهر يتظاهر بحرية و سلام.
و ده كان برضو موضوع الرسالة رقم ٥١ (أكمل على بقيت الرسائل، ولا كفاية كدة؟ أنا من رأي كفاية كدة...).
الموضوع شكله كدة إنو ماهو إلا تخويف و إلهاء الناس عن القضايا السياسية، و سير البلد في الوقت اللي هو مش وقت حرج و حساس، بل هو فرصة ممتاز لبنية البلد من جديد بعدل سياسي، و نظام يحترم من الجميع (و ده يشمل إن المجلس كمان يحترمه!) و يحترم الجميع، و حريتهم في التعبير و التجمع و التظاهر. فده مش وقت الخوف،. و لكنه وقت البناء. و مش بناء الاقتصاد و بس، هو برضو وقت بنا مجتمع مدني حر يحترم حق التعبير بحرية من غير تهديد إنو اللي هيعبر بحرية هايتعامل معامله الخونة.
احترمو الشعب عشان الشعب يحترمكو إنتو كمان. حطو إيديك مع الشعب عشان الشعب يحط إيده معاكو. إنتو بتشتغلو عندنا مش إحنا عندكو!
والله الموفق
ليست هناك تعليقات:
إرسال تعليق